Карциномот на бели дробови претставува неопластично заболување на белодробното епително ткиво и може да биде ситноклеточен (анг. Small cell lung cancer, SCLC) и неситноклеточен (анг. Non-small cell lung cancer, NSCLC). Хемотерапевтскиот пристап за третман на NSCLC, односно напреднати, метастатски или рекурентни карциноми, вклучува таргетирана терапија со моноклонални антитела, инхибитори на тирозин киназа, инхибитори на mTOR и KRAS G12C инхибитори.
Терапијата со инхибитори на васкуларниот ендотелен фактор на раст (анг. Vascular endothelial growth factor, VEGF) се состои од специфични моноклонални антитела насочени против VEGF, кои го спречуваат формирањето на нови крвни садови и резултираат со смрт на туморните клетки. Комбинацијата на bevacizumab, претставник од групата на VEGF инхибитори, заедно со paclitaxel и carboplatin претставува прволиниска терапија за третман на напреднат стадиум на NSCLC.
Спроведено е ново мултицентрично, рандомизирано, двојно-слепо и паралелно фаза 3 истражување чија цел била споредба на ефикасноста и безбедноста на BAT1706 - bevacizumab биосличен лек. Студијата вклучувала 649 пациенти дијагностицирани со напреднат стадиум на несквамозен NSCLC. Пациентите биле рандомизирани во две групи – првата група примала BAT1706 во комбинација со paclitaxel и carboplatin, а втората примала bevacizumab во комбинација со paclitaxel и carboplatin. Комбинираната терапија била администрирана на секои 3 недели во 6 циклуси, проследена со терапија за одржување со BAT1706 или bevacizumab.
Примарна задача на истражувањето било определување на стапката на вкупен одговор кај пациентите (анг. Overall response rate, ORR) што претставува пропорција на пациенти кај кои е забележан парцијален или целосен одговор кон терапијата. ORR бил евалуиран по изминување на временски период од 18 недели и резултатите покажуваат дека вкупниот одговор помеѓу групата што примала BAT1706 и групата што примала bevacizumab е споредлив и изнесува 48,0% и 44,5%, соодветно. Дополнително, во студијата била проценета и безбедноста на третманот со BAT1706, при што не биле забележани нови ризици по здравјето на пациентите, односно безбедносниот профил на BAT1706 е споредлив со оној на bevacizumab.
Добиените резултати покажуваат дека BAT1706 е клинички еквивалентен на bevacizumab во поглед на ефикасност, безбедност, фармакокинетика и имуногеност кога истиот се користи во комбинација со paclitaxel и carboplatin во третманот на пациенти со напреднат несквамозен NSCLC.
Референци:
1. SEER Cancer Stat Facts: Lung and Bronchus Cancer. National Cancer Institute. Bethesda, MD. Accessed January 29, 2024. https://seer.cancer.gov/statfacts/html/lungb.html
2. PDQ Adult Treatment Editorial Board. PDQ Non-Small Cell Lung Cancer Treatment. Bethesda, MD: National Cancer Institute. Updated 10/11/2023. Accessed January 29, 2024. https://www.cancer.gov/types/lung/patient/non-small-cell-lung-treatment-pdq.
3. Chen L, Rangel JDG, Cil T, et al. Efficacy and safety of the proposed bevacizumab biosimilar BAT1706 compared with reference bevacizumab in patients with advanced nonsquamous non-small cell lung cancer: A randomized, double-blind, phase III study. Cancer Med. 2023;12(22):20847-20863.