2.Remdesivir

Започната е клиничка студија за Remdesivir за третман на COVID-19

Започната е рандомизирана, контролирана клиничка студија за проценка на безбедност и ефикасност на  антивирусен лек remdesivir кај хоспитализирани возрасни пациенти  дијагностицирани со COVID-19, во медицинскиот центар на Универзитетот Небраска во Омаха. Спонзор на клиничката студија е National Institute of Allergy and Infectious Diseases (NIAID), дел од Националниот институт за здравство во Америка. Ова е прво клиничко испитување во Соединетите Американски Држави за проценка на експериментален третман на COVID-19, респираторна инфективна болест за прв пат откриена во декември 2019 година во Вухан, Кина. Во тек се и клиничките испитувања за remdesivir во Кина.

Remdesivir, развиен од  „Gilead Sciences Inc “, е истражувачки антивирусен лек со широк спектар на делување. Првично е тестиран кај пациенти со ебола вирусно заболување, а покажал ветувачки ефекти и кај животински модели за лекување на Middle East respiratory syndrome (MERS)  и тежок акутен респираторен синдром (SARS), кои се предизвикани од други коронавируси.

Учесниците во клиничката студија мора да имаат лабораториски потврдени резултати за инфекција со SARS-CoV-2 и доказ за зафатени бели дробови. Пациенти со потврдена инфекција кои имаат лесни симптоми слични на оние на настинка или кои немаат очигледни симптоми, нема да бидат вклучени во студијата. Првиот учесник во студијата е американец кој бил вратен во Соединетите Американски Држави, по карантин на крстаречкиот брод „ Diamond Princess “ во Јапонија и кој доброволно се пријавил да учествува во студијата.

Во оваа двојно-слепа студија учесниците кои ги исполнуваат условите ќе бидат распоредени по случаен избор во remdesivir третман-истражувачка или во плацебо група. Пациентите во третман-истражувачката група ќе примаат 200 mg remdesivir  интравенозно на првиот ден од студијата и 100 mg секој нареден ден за време на хоспитализација, вкупно до 10 дена. Плацебо групата ќе добие во еднаков волумен раствор кој не содржи активни состојки.

Од учесниците исто така ќе се обезбедат примероци од крв и брисеви од нос и грло, на секои два дена. Истражувачите ќе ги тестираат овие примероци за SARS-CoV-2.

Резултатите од учесниците ќе бидат споредени на ден 15 за двете групи (remdesivir и плацебо групата) со цел да се утврди дали истражуваниот лек ја зголемил клиничката корист во однос на плацебо. Резултатите се на скала од седум точки, во опсег од целосно излечени до смрт. Истражувачите ќе ја преиспитаат оваа скала откако ќе ги разгледаат податоците од првите 100 учесници.

Не постојат специфични лекови одобрени од FDA или EMA за лекување на лица со COVID-19. Remdesivir сè уште не е одобрен лек никаде на глобално ниво за лекување на лица со COVID-19, безбедноста и ефикасноста за неговата употреба сеуште се испитуваат.

REFERENCE:

NIH CLINICAL TRIAL OF REMDESIVIR TO TREAT COVID-19 BEGINS. Study enrolling hospitalized adults with COVID-19 in Nebraska. Published on February 25, 2020

 

https://www.nih.gov/news-events/news-releases/nih-clinical-trial-remdesivir-treat-covid-19-begins

Leave a Reply

Your email address will not be published. Required fields are marked *

Заборавено корисничко име или лозинка
Ве молиме внесете ја вашата email адреса. Корисничкото име и новата лозинка ќе ви бидат пратени по email.